Cristiano Ronaldo ka thyer heshtjen e tij pasi ishte në bankinë për ndeshjen e 1/8-ës në Kampionatin Botëror ndaj Zvicrës.

Duke postuar në Instagram, ai u kënaq me fitoren “e pabesueshme” të skuadrës dhe ndau një foto të tij duke festuar me skuadrën.

“Ditë e pabesueshme për Portugalinë, me një rezultat historik në kompeticionin më të madh në futbollin botëror”. “Ekspozita luksoze e një ekipi plot talent dhe i ri. Përzgjedhja jonë është për t’u përgëzuar. Ëndrra është e gjallë! Deri në fund! Forca, Portugali!”, ka shkruar CR7.

Ylli portugez shumicën e ndeshjes ishte në stol, por trajneri i Portugalisë, Fernando Santos e ka përgëzuar Cristiano Ronaldon për profesionalizmin e treguar.

“Cristiano ka treguar se ai është profesionist dhe kapiten i vërtetë. Ai nuk krijoi asnjë problem, vërtet”, ka thënë Santos.

“Ne kemi biseduar para ndeshjes dhe ai s’ka asnjë problem me vendimin tim. Cristiano është një shembull”, shtoi portugezi.